اشاریہ اردو جرائد

ادارہ فروغ قو می زبان (حکومت پاکستان) نے پاکستان میں اعلیٰ اردو تحقیق کو بین الاقوامی معیار پر لانے کے لیے اعلیٰ تعلیم کمیشن (ایچ ای سی) کی دیرینہ سفارش پر اشاریہ اردو و جرائد کے سلسلے کاآغاز مجلہ 'علم و فن' کے اولین شمارہ ہی سے کردیا تھا۔ جامعات اور ڈگری دہندہ تعلیمی اداروں نے محکمہ قومی زبان کی اس کاوش کو نہایت وقعت دی۔ اس پذیرائی کے عملی اظہار کی فوری صورت تو یہ ہوئی کہ اردو کے تحقیقی جرائد نے علم و فن کے اسلوب کو اپناتے ہوئے اپنے ہر شمارے کا اشاریہ مرتب کرکے خود بھی شائع کرنا شروع کردیا ہے۔ البتہ کئی ایک جرائد نے اسی اسلوب میں اپنی ترجیحات کے مطابق کچھ حذف و اضافہ یا ترتیب میں قدرے ردوبدل لاکر اپنا اشاریہ شائع کیا ہے۔ بہرحال محکمہ قومی زبان ان مجلات کے شمارہ وار اشاریہ جات کو اپنے شائع کردہ مجموعی اشاریہ اردو جرائد کے اسلوب پر ہی شائع کرے گا تاکہ تمام محققین سب جرائد کو یکجا پاکر اپنے تحقیقی عمل کو آگے بڑھاسکیں۔
علم و فن کے اولین شمارہ میں آٹھ ڈگری دہندہ اعلیٰ تعلیمی اداروں کے اردو تحقیقی جرائد کا اشاریہ شائع کیا گیا تھا۔ دوسرے شمارے میں بھی یہ تعداد آٹھ ہی تھی مگر اس میں بعض اولین جرائد کی جگہ دوسرے جرائد شامل تھے۔ اس بار سات مجلات کا اشاریہ شامل اشاعت ہے۔ یہ کمی بیشی تو ہوتی رہے گا کہ کبھی کوئی ایک اور کبھی کوئی دوسرا جریدہ تاخیر اشاعت کے باعث شامل نہیں ہوگا۔ یہ معمول کی تبدیلیاں ہیں۔ اصل مقصد یہ ہے کہ ان اردو جرائد کی اشاعت میںرکاوٹ نہ آئے اور اعلیٰ تعلیم کمیشن انھیں بہتر درجہ میں شامل رکھے۔
اگرچہ مجلہ 'علم و فن' ماہرین اردو اور مدیران کی توجہ حاصل کرنے میں کامیاب ہوچکا ہے مگر ہم اس میں مزید استقلال و توسیع کے متمنی ہیں۔ چنانچہ یہ کوشش جاری و ساری رہے گی۔ ہمیں صرف آپ کا تعاون درکار ہے۔

صفدررشید